கோகுலத்தில் ஒரு ஏகலைவன்: ஆதலினால்....

Friday, November 2, 2007

ஆதலினால்....

*********************************************
உழுதுபோட்ட நிலம் என் இதயம்
அறுத்து முடிந்த நிலம் உன் இதயம்...

ஆம்..

என் வயலின் பரப்பில் எல்லாம்
உன் பாதத்தின் சுவடுகள்...

உன் வயலின் தாள்களில் எல்லாம்
என் பாதத்தின் ரத்தங்கள்...

*************************************

ஒரு குழந்தையைப் போல‌
என் இதயத்தோடு
நீ விளையாடுகிறாய்...

விளையாடிவிட்டு
உன் வீட்டுக்கும்
எடுத்துச்சென்று விடுகிறாய்...

ஒரு குழந்தையைப் போல‌
எதையாவது மறந்து
என் வீட்டில் விட்டுச் செல்...

நமது உலகத்தில் உள்ள‌
ஒரே விளையாட்டுப் பொருள்
இதயம் மட்டும் தானே....

********************************

எனது எந்தக் கவிதைக்கும்
பிள்ளையார் சுழி
உன‌து பெய‌ர் தான்...

அது போதும்..
வ‌ய‌துக்கு வ‌ந்த‌ வார்த்தைக‌ள்
என் வாச‌லில்
வ‌ரிசையில் நின்று ஏங்கும்...

***********************************

ப‌ற்றி எரிகிற‌து...

உன் விழிக்குள‌த்தில்
நான் விழும் வ‌ரையில்
ஈர‌மாக‌வே இருந்த‌
என் இத‌ய‌ம்....
************************************

ஒரு உலோபியின்
இரும்புப்பெட்டியாய்
உன் இருத‌ய‌ம்...

பூட்டிய‌ சாவியோ
ஒளிந்து கொண்டிருக்கிற‌து
உத‌டுக‌ளுக்குள்...

**************************************
நான் + நீ + காத‌ல் = க‌விதை

அட‌
க‌ண‌க்குப் பாட‌ம் இனிக்கிற‌து....
*****************************************

No comments:

Post a Comment

கவிதா நதியின் தோணித்துறையில்...

இந்த வலைப்பதிவின் ஆக்கத்திலும், ஒவ்வொரு பதிவின் பக்கத்திலும் நின்று ஊக்கமளித்த அத்தனை இதயங்களுக்கும் நன்றிகளோடு தொடங்குகிறேன்....

இந்த மண்ணில் விதையாய் விழுந்து, முளையாய் எழுந்து, தமிழ் மேகத்தின் ஆசிகளில் நனைந்து, புழுதியை பூசிக்கொண்டு வளர்ந்து,கிளைத்து, தழைத்து, தொழில்நிமித்தமாய் கிளைகளையும், கனிகளையும் மட்டும் அயல் மண்ணில் நீட்டுகிற நேரத்திலும், விதை விழுந்த இடத்திலேயே மண்ணைவிட்டு அகலாது நிற்கும் என் வேர்களின் முனகல்களே இந்த வலைப்பதிவுகள்..

என் கவிதையின் ஊற்றுக்கண் திறக்க என்னை கவிதை நதிநோக்கி ஆற்றுப்படுத்திய ஜீவன்களை நன்றியோடு நினைத்து நினைத்து நெகிழ்கிறேன்...

நான் செடியாய் வளரும் பொழுதுகளில்... சிரித்தது, அழுதது, கோபித்தது, காதலித்தது என்று எல்லாமே என் மண்ணோடு தான்...

சொர்க்கத்தில் கொண்டுவிட்டாலும் மண்புழு மண்ணைத்தான் குடையும் என்பதைப் போல.. நானும் குடைந்திருக்கிறேன்.. கிடைத்தவற்றை எல்லாம் இங்கே அள்ளிவந்திருக்கிறேன்... இதில் காதல் எழுத கவிதையில் விற்பனை நோக்கில் கற்பனை செய்திருக்கிறேன்.. என் மண்ணின் நிகழ்வுகளை கட்டுரைகளாய் அசைபோட்டிருக்கிறேன்.. இந்த வடிவபேதங்கள் எல்லாம் புனைவிற்கான என் வசதி கருதியே செய்யப்பட்டவை...

இந்தப் பதிவுகளில் ஏதாவது ஒரு மூலையில் நீங்களும் இருக்கக்கூடும்... தேடித்தான் பாருங்களேன்.. உங்கள் இதயத்தில் அலைகிளப்ப முடிந்தால் நான் வலைவிரித்ததன் பயனை அடைந்த்தாய் எண்ணி ஆயிரம் முறை அகமகிழ்வேன்...

நட்புடன்,
ஏகலைவன்...