கோகுலத்தில் ஒரு ஏகலைவன்: காத்திருப்புக்களின் கையிருப்புகள்

Monday, November 12, 2007

காத்திருப்புக்களின் கையிருப்புகள்

அஞ்சறைப் பெட்டிக்குள்
அடைக்கலமான‌
அம்மாவின் சிறுவாடு....

பஞ்சாரத்துக் கோழிகளாய்
மாடப்பிறைக்குள்
அடைகாக்கப்பட்ட‌
முட்டை விற்ற சில்லரை...

திருப்பதிமலைக்கும்
தீர்த்த யாத்திரைக்கும்
மஞ்சள் துணியில் போட்ட‌
வேண்டுதல் முடிச்சு....

சுட்டித் தம்பியின்
சுற்றுலாக் கனவுகளோடு
மண்டை உடைக்கப்பட்ட‌
உண்டியல் புத்தன்....

அத்தனைக்கும்
மலர்வளையமாய்

கடற்கரையின்
வெயில் தின்ற மணற்பரப்பில்
திட்டுத்திட்டான வெறுமையோடு
உனக்கான காத்திருப்பின்
நெடுகிலும்
வாடாம‌ல் உள்ள‌ங்கைக‌ளில்
நான் ப‌த்திர‌ப்ப‌டுத்திய‌
ம‌ல‌ர்க்கொத்து....

மௌன‌சாட்சியாய்
க‌ன‌க்கின்ற‌
என் இத‌ய‌த்தோடு
ச‌ட்டைப்பைக்குள் இருந்து
துக்க‌ம் அனுஷ்டிக்கும்
உன‌க்கான‌
என் பிற‌ந்த‌நாள் ப‌ரிசு...

No comments:

Post a Comment

கவிதா நதியின் தோணித்துறையில்...

இந்த வலைப்பதிவின் ஆக்கத்திலும், ஒவ்வொரு பதிவின் பக்கத்திலும் நின்று ஊக்கமளித்த அத்தனை இதயங்களுக்கும் நன்றிகளோடு தொடங்குகிறேன்....

இந்த மண்ணில் விதையாய் விழுந்து, முளையாய் எழுந்து, தமிழ் மேகத்தின் ஆசிகளில் நனைந்து, புழுதியை பூசிக்கொண்டு வளர்ந்து,கிளைத்து, தழைத்து, தொழில்நிமித்தமாய் கிளைகளையும், கனிகளையும் மட்டும் அயல் மண்ணில் நீட்டுகிற நேரத்திலும், விதை விழுந்த இடத்திலேயே மண்ணைவிட்டு அகலாது நிற்கும் என் வேர்களின் முனகல்களே இந்த வலைப்பதிவுகள்..

என் கவிதையின் ஊற்றுக்கண் திறக்க என்னை கவிதை நதிநோக்கி ஆற்றுப்படுத்திய ஜீவன்களை நன்றியோடு நினைத்து நினைத்து நெகிழ்கிறேன்...

நான் செடியாய் வளரும் பொழுதுகளில்... சிரித்தது, அழுதது, கோபித்தது, காதலித்தது என்று எல்லாமே என் மண்ணோடு தான்...

சொர்க்கத்தில் கொண்டுவிட்டாலும் மண்புழு மண்ணைத்தான் குடையும் என்பதைப் போல.. நானும் குடைந்திருக்கிறேன்.. கிடைத்தவற்றை எல்லாம் இங்கே அள்ளிவந்திருக்கிறேன்... இதில் காதல் எழுத கவிதையில் விற்பனை நோக்கில் கற்பனை செய்திருக்கிறேன்.. என் மண்ணின் நிகழ்வுகளை கட்டுரைகளாய் அசைபோட்டிருக்கிறேன்.. இந்த வடிவபேதங்கள் எல்லாம் புனைவிற்கான என் வசதி கருதியே செய்யப்பட்டவை...

இந்தப் பதிவுகளில் ஏதாவது ஒரு மூலையில் நீங்களும் இருக்கக்கூடும்... தேடித்தான் பாருங்களேன்.. உங்கள் இதயத்தில் அலைகிளப்ப முடிந்தால் நான் வலைவிரித்ததன் பயனை அடைந்த்தாய் எண்ணி ஆயிரம் முறை அகமகிழ்வேன்...

நட்புடன்,
ஏகலைவன்...